Lustige Gedichte

D' Vergeßlichkoit!!
von Karin Trommer

A groaß Übel weit ond broit,
ischd heitzutag d'Vergeßlichkoit.

Alde ond Jonge send betroffa
ond dr weil läschd d'Hausdier offa,
odr du schdoscht em Keller dronda
ond denschd: Was will i denn dahonda?

Du guggeschd rom: Was hont mr äls,
Herdäpfl, Birra, Zwetschgagsälz!
Oder bischd wegem Moscht rabkomma,
na häddeschd doch an Krug mitgnomma!

Kurzom - s'goht dr s'Liacht net auf,
drom schdeigt mr d'Schtiega wiedr nauf,
wo droba na dr Groscha fällt
Essiggurka han i gwellt!!

Will mr zom Eikaufa en Lada,
na dät a Zeddel gar net schada.
Also machsch dr gschwend a Lischd,
daß'd ao ganz gwieß nex vergischd:

Essig, Öl, Zucker on Salz
ond a baar Bombo fir dr'Hals,
Margarine, Buddr, Käs
ond an Milchschoklad für d'Bäs!

Ao no a Päckle Äpfelschniedle
ond a Kloo-Babier für's Fiedle!
Jetzt ka dr gar nex meh bassiera
ond du kasch zfrieda losmarschiera.

Doch wenn'd na em Lada drenna bischd,
häschd älles bei dr - bloaß koi Lischd!!!
Dui haschd halt wiedr liege lao,
ach was - da könnt's oim doch vrgao!

Willschd du oimol in d'r Wocha,
gern amoal an Gulasch kocha,
Fett ond Paprika send dao
ond a paar Zwiebel sicher ao.

Doch mr muaß vegetarisch essa,
denn mr hot ja s'Fleisch vergessa!
Ja, dao bassieret oim so Sacha,
da kann mr nemme driabr lacha.

Ao mei Freindin hat's ganz arg verwischd,
dass se scho halba hinderfirre ischd.
"Maa," sait se, "dem mach i a End,
bevor mr voll ganz depped send!

I han e dr Zeidong gleasa,
mr miaßd bloß feschde Knoblauch essa,
jeden Dag a kloine Zeah,
des schdenkt zwar feschd - doch duat's net weah!"

Ond glei vrzähld ses älle Leit,
das zom Kaffe jetzt Knoblauch geiht!
So ogfähr vierzeh Däg gonnt rom,
dao kommt mei Freindin zom Bäckr nomm.

Wo d'r Bäckr glei von weitem schreit:
"Wia wirkt dr Knoblauch - bischd jetzt gscheit?"
Wia goht's dr jetzet ond deim Alda,
kennet dr d'Sach jeatzt bessr bhalda?"

D'Babett sait:"Mr send ganz gschlaga,
ieber d'Wirkong ka dr gar nix saga!
Mir hänt fei no dia gleiche Sorga,
weil - mir vrgesset dr Knoblauch äll Morga !!!"